धन्य अंबापूर महिमा विचित्र ।
पार्वती अवतार योगिनी क्षेत्र ।
दंतासुर मर्दोनी केले चरित्र ।
सिद्धांचे स्थळ हो महापवित्र ॥
जय देवी जय देवी जय योगेश्वरी ।
महिमा न कळे तुझा वर्णिता थोरी । जय देवी ॥ धृ ॥
पतित पावन सर्व तीर्थ महाद्वारी ।
माया मोचन सकळ माया निवारी ।
साधक सिद्धी वाणेच्या तीरी ।
तेथिल महिमा वर्णू न शके वैखरी । जय देवी ॥ १ ॥
सिद्धलिंग स्थळ परम पावन ।
नरसिंह क्षेत्र तेथे नरसिंह वदन ।
मूळ पीठ रेणागिरी नांदे आपण ।
संतांचे माहेर गोदेवी स्थान । जय देवी ॥ २ ॥
महारुद्र तेथे भैरव अवतार ।
काळभैरव त्याचा महिमा अपार ।
नागझरी तीर्थ तीर्थांचे सार ।
मार्जन करिता दोष होती संहार । जय देवी ॥ ३ ॥
अनंत रूप शक्ती तुज योग्य माते ।
योगेश्वरी नाम त्रिभुवन विख्याते ।
व्यापक सकळा देही अनंत गुण भरिते ।
नीलकंठ ओवाळू कैवल्य माते । जय देवी ॥ ४ ॥