लवथवती विकाळा ब्रह्मांडी माळा ||
विषे कंठ काळा त्रिनेत्रीं ज्वाळा ||
लावण्यसुंदर मस्तकीं बाळा ||
तेथुनियां जळ निर्मळ वाहे झुळझुळां।।
जय देव जय देव श्रीशंकरा ॥
आरती ओवाळू तुज कर्पूरगौरा || १ ||
कर्पुरगौरा भोळा नयनीं विशाळा ||
अर्धागी पार्वती सुमनांच्या माळा ||
विभुतीचे उधळण शितिकंठ नीळा ||
ऐसा शंकर शोभे उमावेल्हाळा | जय || २ ||
देवी दैत्यीं सागरमंथन पै केलें ।
त्यामाजी अवचित हलाहल उठिलें ।
तें त्वां असुरपणे प्राशन केलें ।
नीलकंठ नाम प्रसिध्द झालें || जय || ३ ||
व्याघ्रांबर फणिवरधर सुंदर मदनारी ||
पंचानन मनमोहन मुनिजनसुखकारी ॥
शतकोटींचे बीज वाचे उच्चारी ।
रघुकुळटिळक रामदासा अंतरीं || जय || ४ ||