गुरु हा संतकुळींचा राजा ।
गुरु हा प्राणविसावा माझा ।
गुरुविण देव नाही दुजा ।
पाहतां त्रिलोकीं ॥१ ॥
गुरु हा सुखाचा सागर ।
गुरु हा प्रेमाचा आगर ।
गुरु हा धैर्याचा डोंगर ।
कदाकाळी डळमळेना ॥२ ॥
गुरु हा सत्यालागी साह्य ।
गुरु हा साधकांसी माय ।
गुरु हा कामधेनु गाय ।
भक्तांघरी दुभतसे ॥३ ॥
गुरु हा भक्तींचे मंडण ।
गुरु हा काळासी दंडण ।
गुरु हा करितसे खंडण ।
नानापरी पापांचे ॥४ ॥
गुरु हा वैराग्याचे मूळ ।
गुरु हा परब्रह्म केवळ ।
गुरु हा दाखवी तात्काळ ।
गांठी लिंग - देहाचें ॥५ ॥
गुरु हा घाली ज्ञानांजन ।
गुरु हा दाखवी निजधन ।
गुरु हा सौभाग्य देऊन ।
स्वात्मबोध नांदवी ॥६ ॥
काया काशी गुरु उपदेशी ।
तारकमंत्र दिला आम्हांसी ।
बाप विठ्ठल रखुमायेसी ।
विठ्ठल विनवी गुरुचरणी ॥७ ॥