ज्या संगतीनेच विराग झाला ।
मनोदरींचा जडभास मेला ।
साक्षात् परात्मा मज भेटवीला ।
विसरूं कसा मी गुरुपादुकाला ॥१ ॥
सद्योगपंथें घरि आणियेलें ।
अंगेंच मातें परब्रह्म केलें ।
प्रचंड तो बोधारवी उदेला ।
विसरूं कसा मी गुरुपादुकाला ॥२ ॥
चराचरी व्यापकता जयाची ।
अखंड भेटी मजला तयाची ।
परं पदी संगम पूर्ण झाला ।
विसरूं कसा मी गुरुपादुकाला ॥३ ॥
जो सर्वदा गुप्त जनांत वागे ।
प्रसंगा भक्तां निजबोध सांगे ।
सद्भक्तिभावाकरितां भुकेला ।
विसरू कसा मी गुरुपादुकाला ॥४ ॥
अनंत माझे अपराध कोटी ।
नाणी मी घालुनि सर्व पोटी ।
प्रबोध करितां श्रम फार झाला ।
विसरू कसा मी गुरुपादुकाला ॥५ ॥
कांही मला सेवनही न झालें ।
तथापि तेणें मज उद्धरीलें ।
आतां तरी अर्पिन प्राण त्याला ।
विसरु कसा मी गुरुपादुकाला ॥६ ॥
माझा अहंभाव वसे शरीरीं ।
तथापि तो सद्गुरु अंगिकारी ।
नाहीमनी अल्पविकार ज्याला ।
विसरु कसा गुरुपादुकाला ॥७ ॥
आतां कसा हा उपकार फेडू ।
हा देह ओवाळुनि दूर सांडूं ।
म्यां एकभावे प्रणिपात केला ।
विसंरु कसा मी गुरुपादुकांला ॥८ ॥
जया वानितांवानितां वेदवाणी ।
म्हणे नेति नेतीति ' लाजे दुरुनी ॥
नव्हे अंत ना पार ज्याच्या रूपाला ।
विसंरु कसा मी गुरुपादुकाला॥९ ॥
जो साधुचा अंकित जीव झाला ।
त्याचा असे भार निरंजनाला ।
नारायणाचा भ्रम दूर केला ।
विसरूं कसा मी गुरुपादुकाला ॥१० ॥