श्री तुळजाभवानी स्तोत्रम् | टेंबे स्वामी रचित

॥ श्री तुळजाभवानी स्तोत्र ॥

नमोऽस्तु ते महादेवि शिवे कल्याणि शांभवि ।
प्रसीद वेदविनुते जगदंब नमोऽस्तु ते ॥ १ ॥

जगतामादिभूता त्वं जगत्त्वं जगदाश्रया ।
एकाप्यनेकरूपासि जगदंब नमोऽस्तुते ॥ २ ॥

सृष्टिस्थितिविनाशानां हेतुभूते मुनिस्तुते ।
प्रसीद देवविनुते जगदंब नमोऽस्तुते ॥ ३ ॥

सर्वेश्वरि नमस्तुभ्यं सर्वसौभाग्यदायिनि ।
सर्वशक्तियुतेऽनंते जगदंब नमोऽस्तु ते ॥ ४ ॥

विविधारिष्टशमनि त्रिविधोत्पातनाशिनि ।
प्रसीद देवि ललिते जगदंब नमोऽस्तु ते ॥ ५ ॥

प्रसीद करुणासिंधो त्वत्तः कारुणिका परा ।
यतो नास्ति महादेवि जगदंब नमोऽस्तु ते ॥ ६ ॥

शत्रूञ्जहि जयं देहि सर्वान्कामांश्च देहि मे ।
भयं नाशय रोगांश्च जगदंब नमोऽस्तु ते ॥ ७ ॥

जगदंब नमोऽस्तु ते हिते जयं शंभोर्दयिते महामते ।
कुलदेवि नमोऽस्तु ते सदा हृदि मे तिष्ठ यतोऽसि सर्वदा ॥ ८ ॥

तुलजापुरवासिन्या देव्याः स्तोत्रमिदं परं ।
यः पठेत्प्रयतो भक्त्या सर्वान् कामान्स आप्नुयात् ॥ ९ ॥

॥ इति श्रीमत्परमहंस परिव्राजकाचार्य श्रीवासुदेवानंदसरस्वती विरचितं तुलजापुरवासिन्या देव्याः स्तोत्रं संपूर्णम् ॥