धन्य धन्य हो प्रदक्षिणा

धन्य धन्य हो प्रदक्षिणा सद्गुरूरायाची | 

झाली त्वरा सुरवरां | विमान उतरायाची || १ || 

पदोपदी अपार झाल्या पुण्याच्या राशी ।

सर्वहि तीर्थ घडली आम्हां आदिकरूनि काशी ।।

धन्य धन्य हे प्रदक्षिणा || २ ॥

 मृदुंग टाळ ढोल भक्त भावार्थे गाती ।

 नामसंकीर्तनें ब्रह्मानंदे नाचती ।।

 धन्य धन्य हे प्रदक्षिणा || ३ ॥ 

कोटि ब्रह्माहत्या हरिती करितां दंडवत | 

लोटांगण घालीतां मोक्ष लोळे पायांत ||

 धन्य धन्य हे प्रदक्षिणा || ४ ॥ 

गुरूभजनाचा महिमा न कळे आगमा निगमासी । अनुभव ते जाणती जे गुरूपदिंचे रहिवासी || 

धन्य धन्य हे प्रदक्षिणा || ५ || 

प्रदक्षिणा करूनि देह भावें वाहिला । 

श्रीरंगात्मज विठ्ठल पुढे उभा राहिला || 

धन्य धन्य हे प्रदक्षिणा . ॥६ ॥