॥ श्री अनादिकल्पेश्वरस्तोत्रम् ॥
कर्पूरगौरो भुजगेन्द्रहारो
गंगाधरो लोकहितावतारः।
सर्वेश्वरो देववरोऽप्यघोरो
योऽनादिकल्पेश्वर एव सोऽसौ।।१।।
कैलासवासी गिरिजाविलासी
श्मशानवासी स्वमनोनिवासी।
काशीनिवासी विजयप्रकाशी
योऽनादिकल्पेश्वर एव सोऽसौ।।२।।
त्रिशूलधारी भवदुःखहारी
कंदर्पवैरी रजनीशधारी।
कपर्दधारी भजकानुसारी
योऽनादिकल्पेश्वर एव सोऽसौ।।३।।
लोकाधिनाथः प्रमथाधिनाथः
कैवल्यनाथः श्रुतिशास्त्रनाथः।
विद्याधिनाथः पुरुषार्थनाथो
योऽनादिकल्पेश्वर एव सोऽसौ।।४।।
लिंगं परिच्छेत्तुमधोगतोयस्य
नारायणश्चोपरि लोकनाथः।
बभूवतुस्तावपि नो समर्थौ
योऽनादिकल्पेश्वर एव सोऽसौ।।५।।
यं रावणस्तांडवकौशलेन
गीतेन चातोषयदस्य सोऽत्र।
कृपाकटाक्षेण समृद्धिमाप
योऽनादिकल्पेश्वर एव सोऽसौ।।६।।
सकृच्च बाणोऽवनमय्य शीर्षं
यस्याग्रतः सोऽप्यलभत्समृद्धिम्।
देवेन्द्रसंपत्त्यधिकां गरिष्ठां
योऽनादिकल्पेश्वर एव सोऽसौ।।७।।
गुणान्विमातुं न समर्थ एष
शेषश्च जीवोऽपि विकुंठितोऽस्य।
श्रुतिश्च नूनं चकितं बभाषे
योऽनादिकल्पेश्वर एव सोऽसौ।।८।।
अनादिकल्पेश उमेश एतत
स्तवाष्टकम् यः पठति त्रिकालम्।
स धौतपापोऽखिललोकवंद्यं
शैवं पदं यास्यति भक्तिमांश्चेत्।।९।।
इति श्री प. प. श्रीवासुदेवानंदसरस्वतीविरचितं अनादिकल्पेश्वरस्तोत्रं संपूर्णम् ।।