आरती जेष्ठा-कनिष्ठा गौरीची | जय देवी जय देवी महालक्ष्मी

॥ आरती जेष्ठा-कनिष्ठा गौरीची १ ॥

जय देवी जय देवी महालक्ष्मी माता ।
जेष्ठा कनिष्ठा गौरी अंबा जगत्राता ॥ धृ ॥

भाद्रपद शुद्ध सप्तमी आवाहन करिती ।
मनी जन आतूर होऊनी स्वागत तव करिती ।
अनुराधा नक्षत्री आगमन हे असती ।
तीन दिन उत्सवी मनी आनंदा भरती ॥
जय देवी जय देवी... ॥ १ ॥

दुजे दिनी प्रभात समयी पाहुणचार करिती ।
आरंभूनी तव पूजा फराळ अर्पिती ।
जेष्ठा नक्षत्री मग महापूजा करिती ।
नैवेद्य अर्पूनी गाऊ तव आरती ॥
जय देवी जय देवी... ॥ २ ॥

जेष्ठा कनिष्ठा गौरी आसनी स्थिर झाली ।
पिलवंडा सहित ही प्रेमे सुतविली ।
विविध पुष्पे वस्त्रमाळ हे भूषण ।
आघाडा दुर्वा ऐसे अन्य आभूषण ॥
जय देवी जय देवी... ॥ ३ ॥

तिसरे दिवशी मुळ नक्षत्री पूजा ।
खिर पोळी नैवेद्य अर्पूया गिरीजा ।
गाऊनी आरती करूनी निर्माल्य गाठी ।
लक्ष्मी रूपे पोवती घालिती मग कंठी ॥
जय देवी जय देवी... ॥ ४ ॥

ऐसा उत्सव जेथे होतो प्रति वर्षी ।
परिवारासहित ही पूजा अतिहर्षी ।
सुवासिनी मग कुंकुमार्चन करिती ।
कथितो संजय सुखाचे योजन हेची ॥
जय देवी जय देवी... ॥ ५ ॥

॥ आरती जेष्ठा-कनिष्ठा गौरीची २ ॥

जय देवी जय देवी महालक्ष्मी माते ।
सुख समृद्धी घेवूनी यावे मम गृहाते ॥ धृ ॥

जेष्ठा कनिष्ठा रुपे भाद्रपद मासी ।
अनुराधा नक्षत्रावर येई माहेराशी ।
लेवूनी महावस्त्र जरभरीत खाशी ।
कुंकूम पावले शोभे माझे अंगणाशी ॥ १ ॥
जय देवी जय देवी...

जेष्ठ शुभ नक्षत्रे पावन पर्वासी ।
षोडश शाक नैवेद्य फुलोरा तुजशी ।
सौभाग्य रक्षणे अर्पीले पोवत्याशी ।
मुखी तांबुले आली शोभा वदनाशी ॥ २ ॥
जय देवी जय देवी...

मुळ नक्षत्र जरी काळ गणनेशी ।
परी वास तुझा राहो आम्हासी ।
सुखदायि वरदायि महालक्ष्मी ऐसी ।
विष्णुकमलसुत सदैव नत त्या पदासी ॥ ३ ॥
जय देवी जय देवी...