जय जय रेणुके आई जगदंबे ।
ओवाळू आरती मंगलारंभे ॥ धृ ॥
शुभ मंगलोत्सव मंगळवारी ।
मंगल वाजंत्री वाजती द्वारी ॥
मंगळकृत जागर समारंभे ।
जय जय रेणुके ॥ १ ॥
मंगल मंडपी तू राजबाळा ।
शोभती मौक्तिक नक्षत्र माळा ॥
भरजरी झालर नारळ अंबे ।
जय जय रेणुके ॥ २ ॥
भडक पीतांबर कंचुकी पिवळी ।
नवरत्न माणिक मणी मोती पवळी ।
तळपति रवि-शशींची प्रतिबिंबे ।
जय जय रेणुके ॥ ३ ॥
कुंकुमकंकणालंकृत वायन ।
चंदनचर्चन अर्चन गायन ॥
उतरति नरनारी तुज लोणलिंबे ।
जय जय रेणुके ॥ ४ ॥
आदिमूळ माये तू विश्वाची राणी ।
लावण्यरुप सौभाग्याची राणी ।
पाहतां तुज देहभान विसंबे ।
जय जय रेणुके ॥ ५ ॥
जाहली दुर्लभ भेट आनंदे ।
पाहिली विमल चरणारविन्दे ॥
मन विष्णुदासाचे विरो अविलंबे ।
जय जय रेणुके ॥ ६ ॥