श्रीदेवी रेणुके । वंदन करितों तुजला ।
दे सन्मती आतां सेवा करण्या मजला ॥ धृ ॥
किती दैत्य मारुनी सुरवर तूं तोषविले ।
अवतार घेऊनी भूधर तूं रक्षीयले ॥ चाल ॥
प्रार्थना करी मी माते तव चरणाला ।
सन्मती देऊनी रक्षी दीन जनांला ॥
श्रीदेवी रेणुके । वंदन करितों तुजला ।
दे सन्मती आतां सेवा करण्या मजला ॥ १ ॥
तसे शुंभ निशुंभा मोक्षपदां त्वां नेलें ।
एकवीरा म्हणवुनी भृगुकुल भूषविलें ॥
पाठीशी राहुनी रक्षी परशुरामाला ।
तशि झणी प्रगटुनी तारी भारताला ॥ चाल ॥
करूं किती अतां मी धांवा चंडिके ।
झणिं पाव भवानी माते भाविके ॥
तव प्रसन्न करण्या करितों मी पूजेला ।
ती गोड मानुनी रक्षी बालकाला ॥
श्रीदेवी रेणुके । वंदन करितों तुजला ।
दे सन्मती आतां सेवा करण्या मजला ॥ २ ॥